Pas vendimit të GJKKO-së, e cila la në fuqi masën “arrest në burg”, biznesmeni Ergys Agasi është transferuar nga Blloku i Sigurisë “Mine Peza” në Tiranë drejt paraburgimit të Bradasheshit në Elbasan.
Agasi, i cili prej muajsh ishte në kërkim, u arrestua më 26 gusht në zonën e Plepave në Durrës nga Forcat Operacionale të Policisë, teksa lëvizte me automjet. Pas arrestimit, ai u shoqërua në ambientet e Bllokut të Sigurisë në Tiranë, ndërsa tashmë do të qëndrojë në paraburgimin e Bradasheshit.
Në momentin e arrestimit, në automjetin ku ndodhej Agasi ishte edhe Ulian Shpataraku, ish-zyrtar i lartë i Policisë së Elbasanit.
Biznesmeni është nën hetim që prej vitit 2025 dhe ndaj tij rëndojnë dyshime për një sërë veprash penale, mes tyre konkurrencë e paligjshme nëpërmjet dhunës, heqje e paligjshme e lirisë, shkelje e barazisë së pjesëmarrësve në tendera apo ankande publike, grup i strukturuar kriminal, pastrim i produkteve të veprës penale dhe korrupsion aktiv i personave që ushtrojnë funksione publike.
Sipas hetimeve, Agasi dyshohet se ka pasur rol në një grup që synonte të ndikonte dhe manipulonte procedurat e tenderëve të AKSHI-t, përmes presioneve dhe konkurrencës së paligjshme.
Në të njëjtën dosje është përfshirë edhe biznesmeni Ermal Beqiraj, i cili u arrestua pak kohë më parë në Francë. Të dy akuzohen për “grup të strukturuar kriminal” dhe “manipulim me tenderët” e AKSHI-t.