Gjykata do të shpallë nesër vendimin mbi akuzat ndaj lideres së ekstremit të djathtë, Marine Le Pen, e cila akuzohet për përvetësim fondesh nga Parlamenti Europian.
Nëse shpallet fajtore, Le Pen mund të përballet me ndalimin e kandidimit në zgjedhjet presidenciale të vitit 2027, ku synon të pasojë Emmanuel Macron. Prokurorët kanë kërkuar një dënim me burg, një gjobë prej 300 mijë eurosh dhe ndalimin e mbajtjes së posteve publike për pesë vite.
Le Pen ka reaguar ashpër ndaj akuzave, duke i cilësuar si një përpjekje për “vdekjen e saj politike”. Ajo pretendon se prokurorët po përpiqen t’i privojnë francezët nga mundësia për të zgjedhur kandidatin që duan.
E pyetur për të ardhmen e saj politike, Le Pen u shpreh:
“Frika nuk e largon rrezikun, kështu që nuk shoh ndonjë interes për të hamendësuar paraprakisht. E konsideroj veten plotësisht të pafajshme për akuzat dhe, nëse dënohem, do të përdor ligjin për të mbrojtur pafajësinë time.”