Sali Berisha ka folur për gazetarët nga selia blu pas vendimit të Gjykatës së Apelit që ktheu çështjen e vulës dhe logos së PD për rishqyrtim në shkallë të parë.
Sipas tij, pas këtij vendimi qëndron kryeministri Rama, ndërsa theksoi se demokratët janë të vendosur për të mbrojtur me çdo çmim pluralizmin politik dhe PD-në
“Të dashur demokratë dhe demokrate, mbështetës të PD, qytetarë shqiptarë… sot në darkë Edi Rama komunikoi vendimin e tij me të cilin ka një synim, likuidimin e opozitës shqiptare dhe pluralizmit…Sot 3 gjykatës në një proces të pashembullt kundër pluralizmit lexuan vendimin e përgatitur kohë më parë në zyrën e Ramës, të paralajmëruar kohë më parë trupit diplomatik ose ambasadorëve të caktuar të akredituar në vendin tonë. Unë kam besimin më të madh se demokratët janë të vendosur të mbrojnë me çdo kusht e çmim pluralizmin politik në vend dhe PD. Vazhdimi i skenarit të filluar me tradhtarin e kombit amerikan McGonigal, sot konkludoi me një vendim të pashembullt në historinë e botës.”