Nga foltorja e Kuvendit kreu i grupit aktual të Partisë Socialiste, Taulant Balla ka komentuar vendimin e Gjykatës Kushtetuese, e cila hoqi herësin duke hapur plotësisht listat e kandidatëve për deputetë.
Balla tha se vendimet e Kushtetueses janë të formës së prerë, megjithëse theksoi se duhet të presin vendimin e arsyetuar.
“Nuk dua të hyj në debatin që pasoi vendimi i Gjykatës Kushtetuese për hapjen e listave. Duhet të presim arsyetimin e gjykatës lidhur me këtë dhe vendimet e GJK janë të një forme të prerë. Sapo Kuvendi i ri të fillojë punën një komision i ri i posaçëm duhet të adresojë një sërë çështjes. Duke filluar edhe me çështjen e përfolur për depolitizimin e plotë të administratës zgjedhore. Zgjedhjet e 25 prillit ishin të fundit që shqiptarët jashtë nuk mund tu ofrohet e drejta në zgjedhje,” u shpreh Balla.
Lidhur me debatin për zgjedhjen e kryetarit të ri të AMA, ku institucionet ndërkombëtare kanë bërë thirrje që votimi të shtyhet në shtator, Balla tha se procesi ka qenë sipas procedurave.
“Është përgjegjësi e Kuvendit që të garantojë që institucionet që zgjidhen prej tij të jenë në funksion. Ne kemi bërë një rezolutë për AMA sipas procedurave para disa ditësh. Në këtë këndvështrim unë nuk shoh ose qenka më i rëndësishëm kryetari i AMA se dy të tjerët për institucionet e vettingut. Dua t’ju them që ata që vijnë në shtator minimalisht të paktën këtë traditë të mirë parlamentare që për çështjet që kanë të bëjnë për reformën në drejtësi nuk ka nevojë për shumë debat, por duhet ta kemi këtë kulturë,” deklaroi Balla.