Një gjykatë turke dënoi me më shumë se dy vjet burg kryebashkiakun e Stambollit, Ekrem Imamoglu, rivalin kryesor të presidentit Tajip Erdogan, si dhe i ndaloi atij zhvillimin e aktiviteteve politike, nën akuzat për fyerje të zyrtarëve publikë.
Presidenti turk Rexhep Tajip Erdogan tha të shtunën se nëse ka pasur gabime në vendimin për dënim me burg ndaj Imamoglu, gjykatat do t’i korrigjojnë ato në procesin e Apelit, por shtoi se turqit nuk kanë të drejtë të shpërfillnin vendimet ligjore.
Në komentet e tij të para të drejtpërdrejta pas dënimit të rivalit politik të Erdogan, presidenti turk tha se nuk i intereson se cili do të jetë kandidati i opozitës në zgjedhjet e vitit të ardhshëm.
Imamoglu u ndoq penalisht për fyerje ndaj zyrtarëve publikë në vitin 2019, kur ai kritikoi një vendim për anulimin e raundit të parë të zgjedhjeve lokale që ai kishte fituar kundër qeverisë aktuale 25-vjeçare të Partisë AK të Erdoganit.