Botuesi dhe analisti Henri Çili është njoftuar nga një gjyqtare, e cila e ka njoftuar atë nëpërmjet familjarëve se do të arrestohej.
Për këtë arsye, gjyqtarja është përjashtuar nga procesi, çka ka qenë edhe shkaku për anulimin e seancës së sotme e parashikuar në mesditë ku do të jepej masa e sigurisë për 30 persona të arrestuar.
Për pasojë ndaj gjyqtares Myrvete Shkreli do të bëhet kallëzim për shpërdorim detyre. Ajo akuzohet për nxjerrje të sekretit hetimor.
Prokuroria thotë se kunati i gazetarit, Gazmir Ajdini, ka patur rol kyç në bisedimet mes babait të dy të dy vëllezërve nga Lazarati, Arbion dhe Alban Aliko, shtetasi Adil Aliko.
Në një prej dokumenteve të organit të akuzës deklarohet se kunati i gazetarit, së bashku me avokatin Ilir Korbi, dhe 3 persona të tjerë kanë marrë shumën prej 30 mijë eurosh, e cila i është dorëzuar Çilit.
Po ashtu në datë 21 shkurt shtetasi Jazo Liko ka marrë shumën prej 10 milionë lekësh nga familjarët e një të dënuari me burgim të përjetshëm, për t’ia dorëzuar Gazmir Ajdinajt për llogari të Çilit, ndërsa pjesa tjetër do të jepej në mars për ta ndihmuar në organet e drejtësisë.
Për sa i përket ndërhyrjeve të gazetarit tek funksionarët e sistemit të drejtësisë, rezulton se nga përmbajtja e një bisede të datës 14 janar të zhvilluar në ambientet e një hoteli, një drejtuesi të një organi të lartë të drejtësisë i është kërkuar që të ndikojë që kërkesat e të dënuarve që ai ka ndërhyrë të realizoheshin sa më shpejt.
Funksionari i drejtësisë që nuk përmendet në dosje, i ka kthyer përgjigje Çiliit se dosja e vëllezërve Aliko do ishte në 50 të parat. Pas këtij takimi gazetari ka marrë në telefon kunatin duke i thënë se çdo gjë ishte në rregull.