Drejtori i Përgjithshëm i Policisë së Shtetit, Gledis Nano zhvilloi këtë të mërlurë një vizitë pune në Athinë, ku u prit nga homologu i tij grek, Gjeneral Lieutenant Konstantinos Skoumas.
Ata diskutuan mbi nevojën për forcimin e kuadrit të përbashkët strategjik për luftën kundër krimeve të rënda, krimit të organizuar, trafikut të drogës, emigracionit të paligjshëm, si dhe për hetimin e rasteve të vrasjeve.
Të dy drejtorët shprehën vullnetin e përbashkët për ngritjen e nivelit të bashkëpunimit mes dy vendeve, në çështjet e sigurisë, bashkëpunimit policor, shkëmbimit të informacionit dhe realizimit të trajnimeve të përbashkëta.
“Drejtor Nano ka theksuar se Policia shqiptare është e mirorientuar dhe e vendosur për të bashkëpunuar me partnerët, në veçanti me vendet fqinje, për të rritur forcën parandaluese dhe goditëse ndaj krimit të organizuar dhe krimeve ndërkufitare”, theksohet mes të tjerash në njoftim.