U godit sërish sistemi TIMS nga Irani? Mbrëmjen e së martës rreth një orë e gjysmë, në pikat kufitare të vendit u punua manualisht, pas rënies së sitemit TIMS. Pak para orës 23:00 të ditës së martë, sistemi rikthye dhe puna vijoi normalisht në këto pika. Ndërsa sot, Policia e Shtetit thotë se rënia nuk është si pasojë e një sulmi nga Irani. Po ashtu në reagimin zyrtar, thuhet edhe se do të ketë ndërprerje me afat të shkurtër kohor, në pika të ndryshme kufitare për shkak të ndërhyrjeve të brendshme.
”Ndaj sistemit TIMS, mbrëmjen e djeshme, nuk ka ndodhur sulm kibernetik, por në kuadrin e përmirësimit dhe rritjes së performancës së sistemit TIMS, mbrëmjen e djeshme u realizuan disa procese të parashikuara mirëmbajtjeje, të cilat ndërprenë shërbimin në interval të shkurtër kohor, në disa prej pikave kufitare, por pa sjellë pengesa në lëvizjen e lirë të qytetarëve”,-informon Policia e Shtetit.
Në 15 korrik 2022, sulmi kibernetik ndaj sistemit TIMS për disa kohë paralizoi punën në pjesën më të madhe të pikave të kalimit kufitar.
Sqarim i Policisë së Shtetit
Në lidhje me disa lajme të publikuara mbrëmjen e djeshme, në disa media dhe portale, në të cilat është pretenduar se ka ndodhur përsëri sulm kibernetik ndaj sistemit TIMS, sqarojmë opinionin publik se: Ndaj sistemit TIMS, mbrëmjen e djeshme, nuk ka ndodhur sulm kibernetik, por në kuadrin e përmirësimit dhe rritjes së performancës së sistemit TIMS, mbrëmjen e djeshme u realizuan disa procese të parashikuara mirëmbajtjeje, të cilat ndërprenë shërbimin në interval të shkurtër kohor, në disa prej pikave kufitare, por pa sjellë pengesa në lëvizjen e lirë të qytetarëve.
Konfirmojmë se pas ndërhyrjes së shkurtër, mbrëmjen e djeshme, sistemi TIMS vijon të jetë funksional, në të gjitha pikat kufitare. Sqarojmë se edhe në ditët në vijim, do të ketë ndërprerje me afat të shkurtër kohor, në pika të ndryshme kufitare, për shkak të ndërhyrjeve të brendshme, me qëllim përmirësimin e performancës së sistemit TIMS.
Policia e Shtetit kërkon mirëkuptimin e mediave që para se të publikojnë lajme që kanë impakt tek qytetarët, të kërkojë informacion zyrtar pranë strukturave përkatëse të Policisë së Shtetit.