Ekipi i Milanit mundi Sassuolon me rezultatin 2-1 në ndeshjen që shënoi golin më të shpejtw në historinë e ligës së parë italiane të futbollit.
Në javën e 13-të të Serie A, Milani u ndesh me Sassuolo në stadiumin ”Citta del Tricolore”.
Rafael Leao, i cili tundi rrjetën rivale vetëm 6,2 sekonda pas fillimit të ndeshjes me pasimin e futbollistit turk Hakan Çalhanoglu, shënoi golin më të shpejtë në historinë e ligës, ndërsa kaloi Milanin në epërsi 1-0.
Rekordin e mëparshëm në kampionat e mbante Paolo Poggi, i cili kishte shënuar 8 sekonda pas fillimit me fanellën e Piacenzas në dhjetor të vitit 2001.
Golin e dytë për Milanin e shënoi Alexis Saelemaekers në minutën e 26-të. Ekipi vendas e ngushtoi rezultatin në 2-1 me golin e Domenico Berardit në minutën e 89-të dhe ndeshja përfundoi me këtë rezultat.
Deri më tani këtë sezon, Milani mbetet i pamposhtur me 31 pikë dhe vazhdon të kryesojë në tabelën e ligës së parë italiane, ndërkohë që Sassuolo ka 23 pikë.