Persona ende të paidentifikuar nga policia, dhunuan dhe grabitën një të moshuar në fashin Pirg të Korçës. Luljeta Hoxha tregon edhe dhunën që përjetoi. 67-vjeçarja nuk e ka idenë se kush mund ta ketë kryer grabitjen.
“Deri në orën 10 pa 20 isha zgjuar, rashë të flija dhe ikën dritat. U hap porta, unë isha shtrirë, erdhi një trup i gjatë dhe m’u hodh sipër. Lekët, më tha, se të vrava! I thoja se nuk kam lekë, vetëm pensionin. Lekët, më tha përsëri, se të vrava. Më lidhi duart dhe gojën me një leckë dhe litar, dhe më godiste. Më mori zvarrë nga dhoma tjetër, e më kërkonte përsëri lekë.
Nxori thikën dhe më godiste me shkelma. Lekët i kisha kursime sepse kisha shitur tokat. Mendoja të kisha lekët për t’u pleqëruar e varrosur. 10 000 euro m’i mori. Në divan i kisha fshehur, aty ku flija. I gjeti vetë. Policia erdhi pasi u përmenda. Kam dhimbje të mëdha. Shkova te komshinjtë, kërkova ndihmë. Isha e goditur dhe me enjtje. Lajmëroi policinë komshia, më pyetën dhe u tregova. Më mori policia dhe më solli pa ndjenja në spital”, tregon e moshuara.