Greqia ka bërë një hap të rëndësishëm në forcimin e mbrojtjes së saj, duke shpallur se do të blejë 16 raketa MM40 Exocet BLK 3 me funksione të dyfishta nga Franca, si pjesë e planit të saj 12-vjeçar për modernizimin e arsenalit të ushtrisë. Kjo blerje, që përfshin raketa me një rreze veprimi deri në 200 km, vjen në një moment të ndjeshëm gjeopolitik, ku Greqia përballohet me sfida të mëdha në rajon dhe është e angazhuar në marrëdhënie të ngushta me Francën për garantimin e sigurisë së saj.
Lajmi për blerjen e raketave u konfirmua gjatë vizitës së Ministrit të Mbrojtjes të Francës, Sebastien Lecornu, në Athinë, ku ai u takua me homologun e tij grek, Nikos Dhendias, dhe kryeministrin Kyriakos Mitsotakis. Gjatë bisedimeve, Lecornu theksoi angazhimin e Francës për mbrojtjen dhe sigurinë e Greqisë, duke vënë në dukje rëndësinë e një avantazhi teknologjik të vazhdueshëm për Greqinë, në mënyrë që ajo të mund të parandalojë kërcënimet nga forcat që shkelin marrëveshjet ndërkombëtare.
Raketa MM40 Exocet BLK 3, e njohur për aftësinë e saj asgjesuese dhe për rrezet e gjata, mund të vendoset ose në njësitë e flotës luftarake ose në ishuj për të ofruar mbrojtje të fuqishme kundër kërcënimeve ajrore dhe detare. Ajo është e dizajnuar të funksionojë edhe në kushte të pafavorshme moti dhe në mjedise me Luftë Elektronike, duke e bërë Greqinë më të fortë në mbrojtjen e kufijve të saj detarë.
Përveç raketave, ministri Lecornu njoftoi se Franca po propozon që fregatat shtesë Belharra të prodhohen në Greqi, me një pjesëmarrje të konsiderueshme të industrisë greke, që mund të arrijë deri në 40%. Ky projekt mund të realizohet ndoshta në kantieret detare të Skaramangas, një hap i rëndësishëm në forcimin e bashkëpunimit ushtarak midis dy vendeve.
Vizita e Lecornu erdhi pas stërvitjes ushtarake shumëkombëshe “Iniohos 2025”, që u mbajt në bazën e Andravidës në Greqinë perëndimore, dhe pas mbërritjes së aeroplanmbajtëses franceze Charles de Gaulle në bazën e Sudës në Kretë. Në këtë kontekst, Greqia po punon për të realizuar një projekt ndërlidhjeje elektrike nënujore kabllore me Qipron, një iniciativë që ka ndeshur kundërshtimin e fortë të Turqisë dhe ka rindezur tensionet mes dy vendeve.
Ky modernizim i mbrojtjes është pjesë e një përpjekjeje më të gjerë të Greqisë për të rritur kapacitetet e saj ushtarake, duke bashkëpunuar ngushtë me Francën, Izraelin dhe Shtetet e Bashkuara. Pas daljes nga kriza ekonomike, Greqia ka arritur të rinovojë dhe të përmirësojë të gjitha sektorët e forcave të armatosura, me fokus në forcimin e sigurisë kombëtare dhe ruajtjen e sovranitetit të saj në një periudhë të pasigurt gjeopolitike.