“Ne jemi kudo për atdheun,”-kështu thotë një nga parullat më të famshme të Ushtrisë greke. Mediat greke kanë bërë me dije se Greqia ka vendosur për herë të parë prezencë ushtarake në ishullin e Othonoit, që është afër ujërave territoriale shqiptare në Detin Jon.
“Ta Nea” thotë se puna për të vendosur postën ushtarake në këtë ishull ka nisur edhe si kërkesë e vazhdueshme e 400 banorëve të tij, edhe pse nuk ka asnjë kërcënim, ndryshe nga skaji i saj lindor.
“Në këtë zonë mund të mos ketë rrezik dhe kërcënim të përhershëm si në kufijtë lindorë, por prania e Ushtrisë do të marrë një rëndësi të veçantë. Kjo sepse qeveria është e orientuar në periudhën e ardhshme të rrisë sovranitetin grek duke shtrirë ujërat tona territoriale në Jon në 12 milje,”-shkruhet në artikull.
Ndërkohë Shqipëria dhe Greqia kanë rënë dakord që t’i drejtohen Gjykatës së Hagës për ndarjen e Zonës Ekskluzive Ekonomike. Vendimi u bë publik nga kryeministri Edi Rama dhe ministri i Jashtëm grek, Nikos Dendias, gjatë vizitës që ky i fundit bëri në Shqipëri.