Në muajin prill, zv.ministrja e Shëndetësisë, Eugena Tomini u shpreh se niveli i transmetueshmërisë së COVID pësoi rënie. Një nga shkaqet që ka ndikuar në numrin e rasteve të reja është edhe fushatat e vaksinimit, u shpreh Tomini në një lidhje direkte me edicionin qendror të lajmeve në “Vizion Plus”
“Epidemia ka patur një vijueshmëri që nga java e parë e 8 marsit 2020, ka pasur një luhatje të kurbës. Reflekton një ulje të qëndrueshme në javët që po përjetojmë. Në 4 javët e prillit kemi pasur një rënie, kjo shihet nga reagimi fiziologjik i virusit, ulja e transmetueshmërisë, vaksinimi, ku hallkat e infektimit janë ulur me një a dy doza.”
Tirana, theksoi Tomini, mban peshën më të madhe të arritjes së imunitetit në nivel vendi.
E pyetur nëse pritet të kemi rritje të infektimeve javët në vijim, duke patur parasysh se kemi lënë pas fushatën zgjedhore dhe takimet masive, zv.ministrja pohoi: “Në javën e 2 a 3 të majit mund të kemi një tendence në rritje të raste pozitive me COVID. Urojmë që të jemi në nivele të ulëta.”
Më tej, Tomini parashikon se vera e këtij viti do të jetë më e qetë.
“Mendoj dhe besoj se vera e këtij viti do të jetë ndryshe nga viti 2020. Respektimi i masave do të vijojë, pavarësisht përkrahjes së fushatës së vaksinimit masiv.”