Grupi parlamentar i Miqësisë, Shqipëri-Britani e Madhe po zhvillon një vizitë zyrtare dyditore në Londër, me ftesë të kryetarit të Grupit të Miqësisë, Fabian Hamilton.
Delegacioni kryesohet nga kryetari i grupit parlamentar të Miqësisë Shqipëri-BM, Lavdrim Krashi, me pjesëmarrjen e anëtarëve: Pandeli Majko, Jorida Tabaku, Pranvera Resulaj dhe Bledion Nallbati.
Qëllimi i kësaj vizite është forcimi i marrëdhënieve dypalëshe midis dy vendeve dhe shkëmbimi i informacioneve dhe përvojave veçanërisht sa i përket teknikave të tilla si PSL dhe corruption proofing (korrigjimin e korrupsionit).
Vizita u hap me takimin shumë miqësor me zëvendëskryetaren e parlamentit britanik, Nusrat Ghani. Duke e falënderuar zëvendëskryetaren Ghani për mundësinë e këtij takimi, Krashi u ndal në shkëmbimet shumë intensive dhe të frytshme në nivele të ndryshme që Kuvendi i Shqipërisë dhe Parlamenti britanik kanë pasur vitet e fundit.
Veçanërisht i rëndësishëm u vlerësua edhe bashkëpunimi dhe mbështetja e WFD (Westminster Foundation for Democracy) sa i përket kontrollit postlegjislativ dhe parandalimit të korrupsionit.
Komuniteti shqiptar në BM u konsiderua si një urë lidhëse e fortë mes dy vendeve. Gjithashtu, gjatë takimit u diskutua mbi mundësitë e thellimit të bashkëpunimit në fushën e energjetikës, turizmit, mbrojtjes etj.
Në kuadër të kësaj vizite u zhvilluan takime edhe me parlamentarë të tjerë anëtarë të Grupit të Miqësisë me Shqipërinë, si edhe me kryetarin e Komisionit të Çështjeve të Drejtësisë, Andy Slaughter.
Në ditën e dytë të programit janë parashikuar takime në Ministrinë e Punëve të Jashtme, Komonuelthit dhe Zhvillimit, takim me kryetarin dhe anëtarë të Komisionit Parlamentar për Standardet si dhe Komisionit Parlamentar për Çështjet e Brendshme.