Lideri i opozitës Juan Guaido, i cili e ka shpallur veten president të përkohshëm, u kthye në Venezuelë, ndonëse rrezikon të arrestohet. Në aeroportin e Venezuelës, ai u prit nga diplomatët amerikanë dhe evropianë, si dhe një grup përkrahësish të cilët thërrisnin emrin e tij.
Përkundër një ndalese udhëtimi të vendosur nga Gjykata muajin e kaluar, Guaido vizitoi vendet e Amerikës Latine. Ai po angazhohet të fitojë mbështetjen e vendeve fqinje për ta larguar nga pushteti presidentin e kontestuar, Nicolas Maduro, si dhe për të krijuar një qeveri tranzicioni që do t’i paraprijë zgjedhjeve të lira dhe të ndershme. Guaido i ka bërë thirrje Maduros të japë dorëheqjen dhe u kërkoi venezuelianëve të bashkohen në protestat anti-qeveritare.
Ai është njohur si presidenti i përkohshëm nga mëse 50 vende të botës, përfshirë Shtetet e Bashkuara, Shqipërinë dhe Kosovën. Ndërkaq presidenti i kontestuar Nicolas Maduro gëzon mbështetjen e Rusisë, Kinës dhe Kubës. Maduro është përballur me akuza edhe për abuzime me të drejta të njeriut, si dhe për keqmenaxhim të ekonomisë së Venezuelës.