Një nga kushtet për çeljen e negociatave sipas deputetes Rudina Hajdari do të jetë ndëshkimi i të gjithë politikanëve të korruptuar dhe që kanë vjedhur vota. Gjatë një interviste në rubrikën “Mbrëmje Ide” me gazetaren Mirela Milori, deputetja e opozitës pohoi se kjo ka qenë një kërkesë e faktorit ndërkombëtar, sidomos palës gjermane, në takimet e vazhdueshme që janë kryer.
“Mos harrojmë se na ndan një muaj nga vendimi i çeljes së negociatave, që do vijë me kushte të qarta. Ju e patë qartë sot, ishin nëntë kushte dhe një nga kushtet ishte shumë e qartë. Jo në mënyrën e nëntë kushteve pra të detajuara në atë lloj mënyre, por gjithë kohës, sidomos pala gjermane, ka kërkuar që të ketë ndëshkime ndaj figurave politike që janë të korruptuar apo që janë akuzuar për vjedhje votash. Kanë kërkuar që të ketë ndjekje penale ndaj figurave të rëndësishme politike, jo vetëm atyre të niveleve të mesme”, ka deklaruar deputetja Hajdari.