Deputetja e Partisë Demokratike që nuk dorëzoi mandatin, Rudina Hajdari ka sqaruar pozicionin e saj duke mbajtur fjalën në Kuvend.
“Arsyeja pse unë kam hyrë në politikë e qëndrova në Parlament është se dua të sjell një model të ri politik, frymë parlmentare që do i japë fund njëherë e përgjithmonë tranzicionit në Shqipëri”, tha Hajdari.
Politika e mbrapshtë e solli këtë situatë tha ajo duke akuzuar maxhorancë e opozitës, teksa sjell në vëmendje atë që Ramiz Alia u tha studentëve në vitet ’90: “Doni pluralizëm të mendimit apo pluralizëm politik?”
“Nuk ndërtuam dot kurrë kulturën demokratike brenda grupimeve tona. Përshkallëzim ekstrem i sjelljes politike të këtyre 28 viteve. Ripërsëritja e krizave të brendshme politike, sidomos në prag të çeljes së negociatave jo vetëm ngadalëson procesin e integrimit po na ekspozon në mënyrë të rrezikshme ndaj influencave të tjera. Shqipëria në asnjë lloj mënyrë nuk duhet të shihet si një faktor destabilizues në Ballkan po ura bashkëpunimi në vendet e rajonit”, tha Hajdari më tej.