Refik Halili ka deklaruar dje se i ka gati 4 lojtarë për të ardhmen. Presidenti i Tiranës nuk ka dashur të përmendë emra, por “Panorama Sport” zbulon se në listën e gjatë të dëshirave janë edhe katër futbollistë, që mund t’u bashkohen së shpejti bardhebluve.
Bëhet fjalë për portierin e Flamurtarit, Enea Koliçi. 33-vjeçari mund të sillte eksperiencë në portën e kryeqytetasve, por ndërkohë do të ishte e volitshme edhe sa u përket llogarive me numrin e të huajve. Ndryshimet në portë mund të mos mbeten me kaq.
Edvan Bakaj, portieri 32- vjeçar i Luftëtarit, mund të rikthehet te Tirana. Idriz Batha është një tjetër emër që qarkullon në korridoret e klubit të Tiranës.
27-vjeçari ka bërë një sezon mbresëlënës me Flamurtarin dhe duke parë krizën financiare në Vlorë, ai së bashku me Koliçin mund të vishen bardheblu.
Do të jetë disi e vështirë për ish-kapitenin e Partizanit, por nuk do të ishte i pari që kalon në kampin e kundërt.
Ndërkaq, kapiteni i Skënderbeut, Marko Radas, është një opsion për t’i dhënë garanci mbrojtjes bardheblu, që këtë sezon po fut shumë “ujë”. Mbetet për t’u parë se çfarë do të ndodhë gjatë javëve në vazhdim.