Para pak ditësh, një lajm që qarkulloi nëpër meidat italiane bënte me dije se tranjeri i kombëtares shqiptare, Edy Reja i kishte sugjeruar presidentit të Napolit, De Laurentiis emrin e fantazistit kuqezi Nedim Bajrami për ta marrë në skuadër.
Me sa duket, kjo çështje mbetet ende në tryezë. Megjithatë, në një intervistë të fundit për prestigjozen “La Gazzetta dello Sport”, Reja ka folur për talentin tjetër shqiptar i cili luan tek Empoli, Kristjan Asllani, për të cilin shprehet i bindur se është gati për të bërë një hap të madh në karrierë:
“Asllani është një djalosh shumë interesant, për mua është i destinuar për një skuadër të madhe. Nëse De Laurentiis më pyet, do t’ia këshilloja. Asllani me ka bërë shumë përshtypje për personalitetin që ka shfaqur, në mars ai debutoi me përfaqësuesen e madhe, madje kundër Spanjës. Përshtypja që kam për të është shumë e madhe pasi ai di të vendoset në fushë në një mënyrë shumë inteligjente, luan shumë mirë me të dy këmbët”, deklaroi Edy Reja për “La Gazzetta dello Sport”.
