Duam turistë, por mungon kultura, duam pushues, por mungon siguria dhe shteti. Tragjedia që erdhi nga akti i jashtëzakonshëm human dhe vetëflijues i 18-vjeçarit Anri Kashiku, që u hodh në detin e trazuar të Durrësit për të shpëtuar vëllain dhe shokun e tij, të dy 15-vjeçarë, është një dhimbje që vështirë të të lejojë të shkruash, por DUHET. Duhet pasi mes dhimbjes dhe aktit sublim të një të riu që jetën e preu në mes, kërkon atë që shkruajtëm më lart, SIGURI NË PLAZH.
Kullat në plazhet e Shqipërisë janë, por rojet si për dreq nuk ka. Rojet me trupa muskuloz i kemi parë në filma, se në vendin tonë, janë vetëm dërrasat e kullave, që në shumë vende edhe janë kalbur. Pse është kaq e vështirë që shteti të paguajë rojet bregdetare në muajt e sezonit veror? Pse dreqin për ministrat që do të pushojnë e do të relaksohen në muajin gusht në vilat qeveritare, shteti për ta paguan edhe peshqirë me pambukë egjiptian? Pse dreqin pas çdo ngjarje tragjike, duhen renditur PSE-të, kaq e pamundur është siguria në plazhe? Pse dreqin qeveria ulëret çdo ditë për sezon turistik, kur minimuni nuk të ofron siguri?
Çdo subjekt që merr lejen për të përdorur zonën e plazhit duhet të pajiset me rojën bregdetare të kullave të vrojtimit. Këtë e thotë Këshilli i Ministrave. Në teori e zbatueshme, por në praktikë s’ndodh kështu. Leneda Kamberaj, trajnere e licencuar e vrojtuesve të plazhit, thotë se për vitin 2022 janë trajnuar dhe licencuar 19 vrojtues. Por të 19 janë pronar plazhi dhe kjo ndodh për dy arsye.
“Pronarët e plazhit kërkojnë persona për t’i trajnuar që t’ua bëjnë ata pagesën e trajnimit dhe të vendosi vrojtuesit çfarë rroge duan, por nuk ka persona të interesuar. Një arsye tjetër është se pronarët e plazhit nuk duan të paguajnë lekë shtesë për të marrë një punonjës më shumë dhe e bëjnë vetë trajnimin, por nuk është se këta pronar qëndrojnë në pikën e vrojtimit dhe kryejnë rolin e vrojtuesit të plazhit, e marrin vetëm për të marrë lejen e plazhit dhe kaq”.
Anri shpëtoi të vëllain, se gjaku e thirri drejt detit të trazuar, por që të mos kemi më KURRË të rinj që i futen detit për të shpëtuar jetë, e lënë të tyren, kullat shteti duhet ti ketë me roje, ose të mos i mbajë aty sa për fasadë, të mos i mbajë më aty si arkivole që marrin jetë njerëzish në det. Tragjedi të tilla ndodhi kudo, por minimumi i një shteti është SIGURIA. Në plazh shkojmë për të kaluar momente relaksi dhe pushimi, e që të mos kthehen në morte dhe tragjedi, kullat shteti duhet ti mbushë, siç mbush zyrat shtetërore me militantë, duhet të gjejë ROJE bregdetare, të investojë, e ti mbështesë ata që duan të jenë të tillë. /R.Sh/