Ndërtimi i hekurudhës Milot – Rrëshen – Klos në vitet e fundit të regjimit monist, do të ishte ngjarja më e madhe e asaj kohe.
Megjithëse ajo nisi ndërtimin, nga Rrësheni e në Klos nuk u përfundua kurrë. Gjurma e hekurudhës pothuajse është zhdukur, ndërsa kanë mbetur urat të cilat nuk u përfunduan kurrë.
Kjo është një ndër urat e hekurudhës në fshatin Ferrë-Karicë të Njësisë Administrative Baz në Bashkinë e Matit. Kësaj ure i mbetën vetëm pak metra papërfunduar, duke bërë që i gjithë investimi të shkojë dëm.
Banorët nuk e përdorën kurrë për të kaluar mbi të, ndërsa në vitin e mbrapsht të 97-tës, asaj ju vodhën të gjithë elementët metalikë. Xhelal Ndoj, banor i fshatit tregon se ndërtimi i hekurudhës është pritur mjaft mirë në atë kohë, por ndryshimi i sistemit, ndërpreu punimet. Xhelali na tregon se kjo urë mund të funksiononte edhe për të kaluar në fushat e Kongrazhdit.
“Ne mezi prisnim të ndërtohej pasi do të na shërbente shumë si fshat. Jo vetëm për transportin hekurudhor, por edhe për të kaluar në anën tjetër të fshatit atje ku kemi tokat. Me shembjen e regjimit komunist, punimet u ndërprenë dhe ura ka mbetur më pak se 20 metra pa përfunduar. Tani neve na duhet të udhëtojmë shumë larg për të dalë në anën tjetër, pasi kur ka shi rrezikojmë jetën në lum” – thotë Xhelal Ndoj për Vizion Plus.
Edhe një urë e vogël tip bel e ndërtuar pak metra larg urës së hekurudhës nuk është funksionale.
Banorët duhet të kalojnë në anën tjetër, vetëm kur është thatësirë. Ndërsa ura të tilla si kjo e Ferrë-Karicës janë më shumë se katër në të gjithë luginën e Matit, por që të gjitha kanë mbetur papërfunduar.