Një familje nga Lushnja ka rënë viktimë e mashtrimit financiar. Historia e tyre nisi pas firmosjes së disa dokumenteve ku pranuan të ishin dorëzanës për kushëririn e tyre.
Gjergji Korreshi donte të merrte një kredi në vlerën e 16 mijë eurove për biznesin e tij. Të paktën këtë i tha Agimit dhe Meleqes të cilët dolën garant për të.
“Në vitin 2010 ka marë një kredi kushëriri i burrit. Dolëm garant për 16 mijë euro. Dhe na tha që i duheshim për tre muaj si garant. Pas një viti na vijnë nga banka dhe na thonë që personi duhet të paguajë kredinë se nuk po e paguan. Takuam Gjergji Korreshin dhe i thamë do e paguash kredinë ose na hiq ne si garantues. Pasi na tha për tre muaj dhe kishte një vit që s’na kishte hequr. Ky na mashtronte na thoshte jo këtë muaj, por muajn tjetër. Kanë kaluar 10 vjetë tani”, u shpreh Meleqe Halili, denoncuese.
Në 28 tetor 2010 të tre këta persona janë drejtur për kredi te ProCredit Bank. Pa lexuar se çfarë përmbante kontrata dorëzanët kanë firmosur. Në djeninë e tyre firma është dhënë vetëm për një kredi në vlerën e 16 mijë euro. Por, siç do të dalë më vonë, firma e tyre është përdorur edhe për një kredi të dytë në vlerën e 74 mijë euro. Kjo kredi është dhënë po atë ditë shtetasit Gjergji Korreshi i cili nuk e shleu detyrimin.
“I thosha Gjergji po ne pse nuk na dhanë letra? Thoshte që i ka Pro Crediti. Ata nuk na i dhanë se ishte bërë mashtrimi ishin marrë 90 mijë euro kredi kur ne na u tha 16 mijë euro”, u shpreh Meleqe Halili, denoncuese.
Këtu nisin edhe peripecitë për familjen e Agim dhe Meleqe Halili. Banka ju sekuestron shtëpinë dhe truallin pasi Gjergji Korreshi nuk pagoi detyrimet që kishte. Ai është larguar jashtë Shqipërisë duke mos mbajtur përgjegjësi për borxhin e tij. /tch