Në ditën më të bukur të jetës së saj, Elisabetta Socci do të zbulonte se ndërkohë që brenda saj rritej një foshnje, diku në trupin e saj rritej edhe kanceri i gjirit.
Në muajin e tretë të shtatzënisë, 36-vjeçarja italiane nga Ravenna do të niste seancat e para të kimioterapisë, por të pasuksesshme pasi qelizat kancerogjene rriteshin dita-ditës duke u shpërndarë edhe në organet jetike si mëlçia dhe veshkat.
Në muajin e tetë të shtatzënisë solli në jetë vajzën e saj me prerje cezariane, pasi situata e saj shëndetësore po përkeqësohej dhe nuk mund ta përballonte lindjen natyrale. Menjëherë pas lindjes, mjekët i këshilluan të bënte mastektomi pasi kanceri po prekte sistemin limfatik. Ndërkohë që nuk pati mundësi as të ushqente të bijën me gji, gruaja e re i kalonte ditët nëpër spitale derisa ndërroi jetë.
Historia e trishtë u zbulua nga i shoqi, Matteo, i cili ndër të tjera është shprehur: “Nuk është aspak e lehtë për mua, por mbi të gjitha për vajzën tonë, e cila nuk do ta ndiejë kurrë aromën e puthjeve dhe përqafimeve të Elisabetta-s. Gruaja ime u kap fort pas jetës në momentet e saj më të vështira pasi vajza jonë ishte gjithçka që ajo ëndërronte. Shpeshherë nuk bënte kimioterapi pasi i druhej se diçka e keqe mund t’i ndodhte. Unë do ta rris atë duke i thënë se sa e veçantë ishte nëna e saj. Elisabetta nuk reshti së jetuari dhe shijuari të tashmen. Të gjithë e dinin që ishte e sëmurë, por ajo ishte një luftëtare, ndaj u them të gjitha vajzave dhe grave në të njëjtën situatë të mos heqin kurrë dorë.”