Me lot në sy Mirela Kollçaku rrëfeu publikisht historinë e saj të emigrimit nga Kavaja drejt komunës së Cavaglian në Itali. Këtë e bëri në prani të 14 “delegacioneve” të pushtetit lokal nga Shqipëria, Italia, Franca, Estonia e Lituania.
Vajza nga Kavaja tha se me 28 janar 1998 mori vendimin për të lënë vendlindjen, Kavajën, për të emigruar drejt Italisë. “Babait dhe nënës nuk i tregova. U thashë se nuk do të largohem. Por bashkë me Luanin e kishim marrë vendimin për të ikur nga Shqipëria. Unë humba vendin e punës në Ndërmarrjen Tekstile. Edhe burri mbeti i papunë. Të gjitha fabrika dhe ndërmarrjet u mbyllën. Çfarë të bënim, si të jetonim”, tregoi publikisht Mirela.
Ajo tha mes lotëve se kishte udhëtuar gjatë gjithë natës me gomone drejt Italisë. “Rreth mesnatës, tha Mirela, hipëm në gomonen që drejtohej nga dy skafistë. Ata mbanin te këmbët mbanin dy kallashnikovë. Ishim 30 veta. Kur u nisëm pata shumë frikë. U bëmë qull nga uji. Pas afro gjashtë orësh mbërritëm në Bari. Policia italiane nuk na pengoi fare kur zbritëm. Mora trenin dhe u nisa drejt Cavaglian, aty ku qëndronte motra ime. Kisha mësur pak fjalë italisht dhe nuk pata probleme për të komunikuar”.
Shumë shpejt ajo nis punën në kishën e zonës si sanitare, ku punon për 7 vite. Pastaj shërben në një familje. “I shërbeja një të moshuare, thotë 50 vjeçarje. Kishte probleme më shëndetin mendor dhe përsëriste fjalët herë pas here. Unë mbaja shënime dhe kur takohesha me motrën e pyesja për kuptimin e fjalëve. Kjo më shërbeu për të mësuar gjuhën italane, tregon vajza nga Kavaja”.
Aktualisht Mirela punon në një dyqan, me kohë të pjesshme. Luani, burri është i papunë. Në shtëpi ka edhe vjehrrën dhe kunatën për të cilat kujdeset me shumë dashuri. I shërben edhe djalit 14 vjeçar që vijon shkollën.
“Më ka marrë malli shumë për Shqipërinë, thotë Mirela. Ka 5 vjet që nuk vij dot. Përballemi me plot vështirësi. Shoqatat dhe kisha nuk na i zgjidh dot të gjitha kërkesat. Aktualisht vetëm unë punoj. Do të vazhdoj të punoj fort për të mbajtur familjen”, përfundon rrëfimin e saj Mirela Kollçaku. /tirananews.al/
