Një paketë 8 miliardë euro pritet të adresojë përkohësisht rezervat e personelit shëndetësor në Francë, pas ankesave për paga të ulëta dhe kushte të vështira pune. Ankesat u shtuan muajin e kaluar me protesta në rrugë për shkak edhe të gjendjes prej koronavirusit.
Qeveria franceze i ka dhënë dritën jeshile një marrëveshjeje me sindikatat e punëtorëve duke miratuar një paketë 8 miliardë euro për pagat e punonjësve të sistemit shëndetësor.
Në bazë të saj, personeli mjekësor, ai ndihmës dhe teknik do të përfitojnë 183 euro më shumë në muaj se tani ose 7,5 miliardë euro, 450 milionë euro do u shpërndahen doktorëve në spitalet publike dhe 200 milionë euro të tjera praktikantëve që ende po vazhdojnë studimet e fushës.
Pas 7 javëve negociata intensive dhe demonstratave të fundvitit të kaluar, kryeministri francez, Zhon Kasteks, tha se me marrëveshjen e re vlerësohet puna e sektorit veçanërisht në një periudhë pandemie si kjo që po kalon vendi dhe e gjithë bota.
“Ky është një moment historik për sistemin tonë shëndetësor. Kjo përpjekje për të mbështetur personelin spitalor çmon kontributin e tyre në vijën e parë të luftës me këtë epidemi të paprecedentë dhe të zgjatur. Është edhe një mënyrë për të zgjidhur vite të tëra vonesash për të cilat secili prej nesh, edhe unë ndoshta, mbajmë përgjegjësi.”
Franca ka regjistruar më shumë se 200,000 raste infeksioni me Covidin-19 që u ka kushtuar jetën 30 mijë personave.
Të përballur me këtë situatë, pas dy muajve karantinë kombëtare, qindra mjekë dhe infermierë nisën marshimet në muajin qershor për kushtet e punës dhe pagat e ulëta që po ua vështirësonin atyre gjendjen financiare.
Sipas protestuesve, qeveria e shkuar vërtet i ndau sektorit një bonus 1,500 euro në rrethanat e pandemisë, por kjo për ta nuk konsiderohej një zgjidhje e përhershme.
Të martën, kontributi i sistemit francez të shëndetësisë në betejën me kovidin u vu në pah edhe teksa mbaheshin festimet për ditën e Bastijës, festës kombëtare që kremton rebelimin e popullit ndaj pushtetit mbretëror që kulmoi në fundshekullin e 18-të me revolucionin francez.
Për herë të parë që nga fundi i Luftës së Dytë Botërore, autoritetet franceze anuluan paradën ushtarake në Paris duke i përqendruar këtë vit homazhet për ata që e luftuan dhe ranë viktima të virusit SARS-Cov-2.