Hong Kongu po fillon të braktiset, pasi janë më shumë se 140 mijë persona që kanë braktisur qytetin shtet vetëm gjatë këtij viti, ashtu si dhe shumë kompani të huaja. Ja pse ish-kolonia britanike që cilësohej si “porta e Azisë” ka humbur statusin e dikurshëm dhe kush po e zëvendëson sot.
Sipas Statistikave zyrtare, viti 2022 ka qenë vit rekord për sa i përket personave që kanë lënë, ndoshta për gjithmonë, qytetin-shtet që deri më 1997 ishte ende një koloni britanike.
Bëhet fjalë për gati 140 mijë të tillë që kanë preferuar rrugën plot të panjohura të emigrimit. Një trend që ka filluar nga momenti kur qyteti formalisht autonom iu rikthye Kinës, duke u përkeqësuar ndjeshëm nga viti 2019, pas një seri ligjesh të Pekinit që do të përafrojë ligjet e Hong Kongut me qasjen e Partisë Komuniste.
Të rinjtë janë të parët që duan të ikin. “Nga tetë stazhistët që kam marrë nga universitetet, të gjithë më kanë kërkuar referenca për jashtë”, thotë sipërmarrësja Deborah Khan. Hong Kongu do të mbetet një metropol i rëndësishëm, por nuk do të jetë më dera ndërkombëtare e Azisë, por thjesht një rivale e denjë e Shangait në atë rajon, ku shumë kompani të huaja po preferojnë të transferojnë zyrat dhe investimet e tyre drejt një tjetër qyteti shtet, Singapori, që po merr trashëgiminë e Hong Kongut të dikurshëm.