Një zjarrfikës që humbi jetën në sulmet e 11 shtatorit u preh në banesën e fundit vetëm këtë të martë, pasi eshtrat e tij u identifikuan vetëm 18 vite më pas.
Miqtë, kolegët dhe të afërmit e tij i dhanë lamtumirën e fundit Michael Haub, dhe sipas shoqatës së Zjarrfikësve ceremonia u organizua për ti dhënë paqen dhe qetësinë familjes së tij pas identifikimit të mbetjeve të turpit të gjetura në Pikën “Zero”.
CNN thotë se mjekësia ligjore ka identifikuar mbetjet e trupit të 60% të 2753 personave që humbën jetën në World Trade Center.
Por krahas zjarrfikësve që humbën jetën atë ditë, qindra të tjerë vdiqën në vitet e mëvonshme. Sipas të dhënave zyrtare të Nju Jorkut, 200 zjarrfikës kanë humbur jetën pas sëmundjeve të lidhura me kohën kur ata punuan në WTC.
“Është e trishtë që pasi humbëm 343 anëtarë më 11 shtator, tani kemi edhe 200 të tjerë që kanë ndërruar jetë si pasojë e sëmundjeve të lidhura me 11 shtatorin”, tha në korrik një zyrtar i zjarrfikësve.
Më 11 shtator 2001, 19 terroristë drejtuan katër avionë drejt pikave strategjike të SHBA. Rreth 2977 persona u vranë në Nju Jork, Uashington, dhe Pensilvania në një sulm të organizuar nga lideri i Al Kaedës, Osama Bin Laden.