Drejtori i News 24 Aleksandër Çipa tha se ndarja nga jeta e Ismail Kadaresë është një lajm i pikëlluar për të gjithë shqiptarët.
Çipa theksoi se Kadareja mbetet gjeniali i letërisë shqipe. Sipas Çipës, Kadare emancipoi shoqërinë përmes fjalëve si dhe fitoi çmime prestigjoze ndërkombëtare në SHBA, Gjermani, Izrael etj.
“Ismail Kadare vlerësohet edhe në arenën ndërkombëtare. Kadare i ofroi lexuesit shqiptar emancipimin përmes fjalëve. Kadare mbetet gjeniali i letërsisë shqipe. Ai në veprat e tij shprehu edhe disidencën ndaj regjimit komunist. Kadare ishte shkrimtari që emancipoi shoqërinë përmes fjalës, qoftë në poezi, në ese ose në prozë. Ai më 1996 u bë anëtar i Akademisë të Shkencave Morale dhe Politike të Francës, akademi që është e famshme për autoritetin e saj, që ka pjesëtar 50 personalitete të rëndësishme globale.
Shkrimtari Kadare fitoi çmime botërore, duke iu imponuar ndërkombëtarëve, ai fitoi çmimin Asturias, ai ka marrë çmime të rëndësishme në SHBA, Gjermani, Izrael, që vijnë për shkak të peshës së madhe të veprave të tij. Kadare e mbarti me dekada të tëra Shqipërinë e mendimit. Në jo pak raste, mediat europiane e kishin Kadarenë si busull orientuese, sidomos për problemet ballkanike”, tha Çipa.