Ruben Saraiva, autori i dyshuar i vrasjes së Ardian Nikulaj është nisur për tu ekstraduar drejt Tiranës.
Bëhet e ditur se punonjës të policisë shqiptare e kanë marrë në kryeqytetin e Marokut Rabat, për ta sjellë në Tiranë.
Ndërkohë pritet që Saraiva të mbërrijë ditën e nesërme në aeroportin e Rinasit.
Vendimi për ekstradimin e vrasësit me pagesë u dha nga Gjykata e Marokut. Për të përmbyllur ekstradimin e Ruben Saraivës, ndërhyri Interpol, agjensia e cila bashkëpunoi me autoritetet shqiptare për lokalizimin e portugezit në marok rreth 7 muaj më parë.
Po për vrasjen e Nikulajt janë arrestuar në Angli 3 shtetas britanikë dhe Edmond Haxhia si porositës. Edhe për këta të fundit autoritetet shqiptare kanë dërguar kërkesë për ekstradimin e tyre nga Britania në Shqipëri.
Vrasja e biznesmenit Ardian Nikulaj ishte në vazhdën e zinxhirit të hakmarrjes që familja e viktimës kanë me një fis tjetër në qytetin e Lezhës, konflikt ky që ndër vite ka prodhuar shumë viktima.