Ish-oficeri i forcave Operacionale të Policisë, Jeton Lami ka dalë nga burgu këtë të pretme, pasi ka përfunduar dënimin për “shpërdorim detyre”. Ai është personi i fundit që mendohet se ka shoqëruar me makinë të shumëkërkuarin Ervis Martinaj, para se ky i fundit të zhdukej pa lënë gjurmë.
Jeton Lami ka refuzuar kategorikisht akuzat për lidhje të tij me zhdukjen e Ervis Martinajt para hetuesve. Sipas tij, me bosin e lojërave të fatit është njohur 10 vite më parë, por e mohon miqësinë e ngushtë.
Sa i përket rastit kur ai është kapur teksa shoqëronte Ervis Martinajn, Lami dëshmoi se është takuar me Ervis Martinajn rastësisht në zonën e ”Zogut të Zi” në Tiranë tre ditë para se ta shoqëronte për në Durrës.
Vetë Martinaj i ka kërkuar ta shoqëronte dhe Lami e ka dërguar në Durrës ku e ka lënë në një hotel me një mikeshën e tij. Ndërkohë që një ditë më vonë ka shkuar në Durrës, e ka marrë Ervis Martinajn dhe mikeshën e tij dhe i ka lënë në një ambient pranë një karburanti në zonën e Vorës dhe që nga ky moment nuk ka pasur më kontakte me të.