Ylli brazilian, Neymar, përjetoi një rikthim emocionues me fanellën e Brazilit në Kupën e Botës 2026, teksa “Seleçao” mposhti Skocinë me rezultatin e pastër 3-0 në ndeshjen e fundit të fazës së grupeve.
34-vjeçari u rikthye në fushë me kombëtaren pas një mungese të gjatë, pasi ndeshja e fundit e tij datonte në tetor të vitit 2023, në përballjen kualifikuese ndaj Uruguait. Neymar u aktivizua në minutën e 76-të në vend të Matheus Cunha, në një moment kur fitorja braziliane ishte thuajse e siguruar.
Hyrja e tij në fushë u prit me duartrokitje nga tifozët në stadiumin e Miamit, ndërsa vetë sulmuesi nuk i fshehu emocionet. Kamerat e kapën duke fshirë lotët në momentin e rikthimit, ndërsa pas vërshëllimës finale përqafoi shokët e skuadrës dhe familjarët e tij.
Kjo ishte paraqitja e 129-të e Neymarit me kombëtaren braziliane, duke shtuar një tjetër moment të rëndësishëm në karrierën e tij të pasur me “Seleçao”.
Përfshirja e tij në listën e trajnerit Carlo Ancelotti për Kupën e Botës u konsiderua surprizë nga shumëkush, pasi lojtari kishte kaluar një periudhë të vështirë për shkak të një dëmtimi në pulpë. Megjithatë, ai arriti të rikuperohej në kohë dhe të ishte i gatshëm për ndeshjen e fundit të grupit.
Edhe pse nuk pritet të jetë një titullar i padiskutueshëm në një skuadër që ka në përbërje emra si Vinícius Júnior, Raphinha dhe Matheus Cunha, rikthimi i Neymarit përbën një shtysë të rëndësishme për Brazilin në prag të fazës me eliminim direkt.