I hutuar dhe pa asnjë fjalë, Alket Arapaj u përball dje me vendimin e Gjykatës për Krime të Rënda, që e la atë në masën e sigurisë “Arrest në burg” pa afat.
Kujtojmë se gardisti, tri ditë më parë, vrau me armën e shërbimit bashkëshorten e tij, Ervilma Seferi. Seanca për Arapajn filloi në orët e paradites së djeshme, ndërsa i prangosuri nuk foli asnjë fjalë gjatë seancës, e cila zgjati rreth një orë.
Burime nga seanca gjyqësore, bëjnë me dije se përveç pendesës për krimin e kryer, 44-vjeçari nuk pranoi të jepte shpjegime para togave të zeza, duke kërkuar që këtë ta bëjë në një moment të dytë. Ndërkohë, gjyqtarja e seancës paraprake, Liljana Baku, pasi dëgjoi prokurorin dhe provat e parashtruara prej tij, vendosi të lërë në burg Arapajn gjatë hetimeve.
Referuar hetimeve, dyshohet se shkak për vrasjen të jetë bërë xhelozia dhe mendimi se bashkëshortja e tij takohej me persona të tjerë. Prokuroria ka ngritur ndaj tij akuzën “Vrasje për shkak të marrëdhënieve familjare”, për të cilën parashikohet masa ekstreme e dënimit, burgim i përjetshëm.
NGJARJA
Ngjarja e rënda ka ndodhur mëngjesin e 12 shkurtit në banesën e çiftit. Alket Arapaj është zgjuar herët dhe ka veshur uniformën e Gardës, pasi pak orë më vonë do të paraqitej në shërbim.
Hetuesit thonë se prej disa kohësh mes çiftit ka pasur debate të vazhdueshme mes tyre, por ditën e krimit situata është acaruar edhe më shumë. Në debat e sipër, dyshohet se gardisti 44-vjeçar ka nxjerrë armën e shërbimit dhe ka qëlluar 3 herë në drejtim të gruas, duke e lënë të vdekur në vend.
Menjëherë pas ngjarjes, ai i ka telefonuar Policisë, duke rrëfyer krimin. Ndërsa u ka treguar se është efektiv i Gardës së Republikës. Për këtë arsye, në vendin e ngjarjes, përveç shërbimeve të Policisë, kanë qenë të pranishëm edhe oficerë të Shërbimit për Çështjet e Brendshme dhe Ankesat, të cilët kryen arrestimin në flagrancë. Arapaj prej 21 vitesh ishte pjesë e Gardës së Republikës.
Ai kishte përfunduar arsimin e lartë ushtarak në vitin 1997 dhe që pas asaj kohë i ishte bashkuar Gardës. Së fundmi, ai mbante gradën Kapiten. Prej disa vitesh, ai shërbente në Njësinë nr.3 të Gardës, te Pallati i Brigadave. Ndërsa më herët kishte qenë edhe shoqërues i Personaliteteve të Larta Shtetërore. Në rrethin shoqëror dhe familjar, Alket Arapaj njihet si person i sjellshëm dhe praktikues i fesë islame, ndërsa edhe gruaja ishte e mbuluar.
Arapaj ishte i pajisur me armën e shërbimit tip pistoletë, të cilën në bazë të ligjit ka të drejtë ta mbajë me vete edhe jashtë orëve të shërbimit. Nga ana tjetër, burime nga Garda e Republikës thanë se Arapaj ishte një efektiv i rregullt, i përpiktë dhe pa masa disiplinore. Edhe bashkëshortja e tij, e cila mbeti e vrarë dje, ishte me arsim të lartë, e diplomuar për Histori-Gjeografi.
Panorama