Skandali me evazionin fiskal vijon, ku sipas një kronike televizive del që Gjyste Sermi kishte ndërruar jetë, por firma e saj del të paktën në 5 dokumente për të plotësuar pranë drejtorisë së Tatimeve dokumentacionin e evazionit të kompanisë Elvi 03.
Lidhur me këtë situatë ka reaguar edhe Presidenti Ilir Meta, i cili shprehet se krimi dhe kapja e shtetit ka kapërcyer çdo imagjinatë. Teksa thotë se koha nuk pret më, nënvizon se duhet luftë e hapur kundër korrupsionit.
“Krimi dhe kapja e shtetit ka kapërcyer çdo imagjinatë. Ndërsa për të marrë pensionin u kërkohet pensionistëve që të paraqiten fizikisht për të provuar se janë gjallë, miliona euro të taksapaguesve tanë grabiten nga mafia e inceneratorëve me firma të falsifikuara të qytetarëve, që janë ndarë nga kjo botë prej 5 vitesh. Vetëm lufta e hapur kundër kapjes së shtetit dhe korrupsionit parandalon falimentimin e Shqipërisë. Koha nuk pret më”, shkruan Meta.