Vëllai i Fredi Belerit, Leonardo Beleri thotë se atij i është kërkuar të hiqte dorë nga bashkia në këmbim të lirisë. “Që nga dita e parë e arrestimit e deri më sot, i vetmi sugjerim që i është bërë Fredit është humbja e Bashkisë së Himarës. Domethënë të deklarojë dorëheqjen për të fituar lirinë”, tha ai për median greke ERT.
Leonardo Beleri u shpreh se e prisnin dënimin me burg të vëllait të tij, duke shtuar se ishte synimi i qeverisë Rama. ”Do të shkojmë në Gjykatën e Apelit, më pas do të shkojmë në Gjykatën e Lartë dhe më pas do të shkojmë në gjykatat evropiane, ku do të jetë i sigurt shfajësimi i kryebashkiakut Himarës”.
Ai parashikoi se dënimi i kryebashkiakut të Himarës do të pasojë edhe në Gjykatën e Apelit, që mund t’i ulë dënimin, por Fredi Belerit nuk i intereson aq nëse do t’i ulet apo shtohet dënimi.
”Kërkojnë që ai të dënohet në apel, të njolloset, të humbasë automatikisht bashkinë. Ky ishte plani i tyre që në fillim dhe deri më tani duket se po realizohet. Në thelb vëllai im ka kaluar 15 muaj burg. Ai lirohet nga burgu në Krishtlindje. Por ai nuk e merr rolin e kryetarit të bashkisë. Nëse në apelin dënohet qoftë edhe një orë, ai automatikisht humb Bashkinë dhe humb të drejtat e tij politike për një periudhë të caktuar kohore, kjo caktohet nga gjykata”.