Tashmë i rikthyer në Partinë Demokratike së bashku me Komisionin e Rithemelimit, ish-kryetari i demokratëve, Sali Berisha, si duket mendon që ta vazhdojë rrugëtimin e Foltores nëpër rrethe.
Sipas njoftimit që vjen nga zyra e tij e shtypit, thuhet se Berisha do të udhëtojë për në Jug të vendit gjatë ditës së nesërme (e diel).
Pritet që në orën 11:00 ai të zhvillojë një takim me demokratët e Tepelenës dhe më pas, dy orë më vonë është thënë se do të udhëtojë për në Përmet.
Theksojmë se këto janë takimet e para që Berisha zhvillon në bazë që kur Gjykata e Tiranës regjistroi statutin e 11 Dhjetorit. Me këtë vendim, gjykata i dha mundësi Berishës dhe deputetëve të tij të shkojnë në selinë e PD-së dhe të njoftojnë riorganizimin e kësaj partie.