Policia kufitare e Shëngjinit ka reaguar pas publikimit të një videoje në media, ku një person shfaqet me “jet ski” në bregdetin e Shëngjinit, duke bërë manovra të rrezikshme, e duke rrezikuar jetën e një pushuesi.
Në një njoftim për mediat, policia bën me dije se videoja nuk është aktuale dhe nuk është regjistruar gjatë këtij sezoni veror.
Reagim i Policisë Kufitare Shëngjin
Në lidhje me një video të publikuar në rrjetet sociale, në të cilën shfaqet një person, me një mjet lundrues “Jet ski”, në det, në Shëngjin, duke kryer manovra që rrezikojnë jetën e një qytetari që po notonte, ju informojmë se:
Pamjet që shfaqen në video nuk janë aktuale të këtij sezoni veror, por të disa viteve më parë. Aktualisht, në vendin që shfaqet në video, ndodhet një objekt i ndërtuar para disa viteve.
Nisur nga publikimet e fundit në portale, të cilat nuk janë pamje aktuale, por që u dërgohen me tendencë portaleve për publikim, me qëllim nxitjen e reagimit qytetar, Policia e Shtetit apelon për çdo portal dhe media vizive e të shkruar, që të mos publikojnë video ose lajme të pakonfirmuara, por të marrin informacion të saktë pranë strukturave përgjegjëse në Policinë e Shtetit.