Numri i infeksioneve respiratore është ulur në rreth 16 mijë në javë. Mjeku epidemiolog, Artan Simaku thotë se qarkullimi i infeksioneve respiratore është prezent në popullatë.
”Java që kaloi u mbyll me 16 mijë raste, pra infeksione respiratore të sipërme dhe të poshtme dhe trendi vazhdon çdo ditë e në ulje. Gripi qarkullon me bashkëqarkullim të covidit dhe virusit respirator sesencial dhe të ashtuquajtura virozave të tjera respiratore. Këto po qarkullojnë në një nivel shumë më të ulët sesa gripi”, tha mjeku Artan Simaku.
Shtrimet në spital, pavarësisht uljes së rasteve, mbeten konstante. ”Kemi patur dy fatalitete të moshës mbi 60 vjeç me sëmundje kronike shoqëruese, diabet dhe sëmundje kardiovaskulare, nga të cilët njëri ishte i pavaksinuar. Karakteristikë që numri i shtrimeve vazhdon i qëndrueshëm, pra nuk ka rritje. Tek fëmijët janë rreth 20 shtrime në javë, ndërsa tek të rriturit janë rreth 50 shtrime”, tha Simaku.
Veç Tiranës, intensitet më të lartë të infeksioneve ka në Dibër dhe sipas epidemiologut përhapje më të madhe është tek të rinjtë. Qarkullimi i infeksioneve respiratore në popullatë do të vijojë deri në fund të muajit Mars.