Ekonomia shqiptare u rrit me 3.71% gjatë tremujorit të parë të vitit 2026, sipas të dhënave të publikuara nga INSTAT. Rritja shënon një përmirësim krahasuar me të njëjtën periudhë të vitit 2025, kur ekonomia u zgjerua me 3.53%, por mbetet pak më e ulët se ritmi prej 3.8% i regjistruar në tremujorin e katërt të vitit të kaluar.
Sipas raportit, kontributin më të madh në zgjerimin ekonomik e dhanë administrata publike, arsimi dhe shëndetësia, të cilat kontribuan me 1.68 pikë përqindje në rritjen totale.
Ndikim pozitiv patën gjithashtu aktivitetet e pasurive të paluajtshme, shërbimet profesionale dhe administrative, si edhe sektori i ndërtimit.
Nga ana tjetër, industria, energjia dhe furnizimi me ujë ushtruan ndikim frenues mbi rritjen ekonomike, së bashku me sektorin e bujqësisë dhe aktivitetet e argëtimit.
INSTAT bën të ditur se rritja ekonomike u mbështet gjithashtu nga zgjerimi i konsumit të familjeve, rritja e investimeve dhe e eksporteve.