Një studim izraelit i përgatitur nga Ministria Izraelite e Inteligjencës, botuar në Israel Today, paralajmëroi për atë që e quajti “fuqia në rritje e Turqisë” në Afrikë, duke theksuar nevojën që Tel Aviv të fitojë më shumë vende në kontinentin afrikan.
Sipas këtij studimi, vendet afrikane votuan në Kombet e Bashkuara si një “bllok votimi” kundër Izraelit dhe në favor të palestinezëve.
Studimi thekson më tej se Izraeli “mund të inkurajojë në një periudhë relativisht të shkurtër kohe 6 vende afrikane të ndryshojnë mënyrën e votimit, por kjo kushtëzohet nga mbështetja e interesave të përbashkëta me ato vende”.
Studimi sugjeroi që Izraeli të përqendrohej në vendet: Togo, Ruanda, Sudani i Jugut, Kameruni dhe Republika Demokratike e Kongos, “duke i hapur rrugën atyre drejt Uashingtonit”, sipas një burimi izraelit.
Studiuesit izraelitë të inteligjencës besojnë se “Tel Aviv mund të punojë me ato vende në fushat e sigurisë, antiterrorizmit, infrastrukturës, shfrytëzimit të burimeve natyrore dhe teknologjisë”.
Studimi theksoi fuqinë në rritje të Turqisë dhe Kinës në Afrikë në vitet e fundit. “Turqia ka katërfishuar praninë e saj zyrtare në Afrikë vetëm gjatë dekadës së fundit, ndërsa Kina po zgjeron ndjeshëm investimet e saj në kontinent,” paralajmëron studimi.
Investimet turke në Afrikë
Tetorin e kaluar, Presidenti turk Rexhep Tajip Erdogan tha se investimi i vendit të tij në Afrikë kishte krijuar 100,000 vende pune në kontinentin afrikan, duke vënë në dukje se vlera e projekteve turke të përfunduara në vendet afrikane ishte rreth 70 miliardë dollarë dhe se vendi i tij kishte rritur numrin e ambasadave në kontinent nga 12 në 42.