Antonio Konte është një trajner që ka fituar thuajse gjithçka, edhe pse jo Champions, por edhe që është larguar me konflikt nga thuajse çdo klub ku ka punuar.
Një faqe e re e historive të tij antike u shkrua në duelin Napoli-Inter, kur trajneri I vendasve u përplas me ish-beniaminin e tij, Lautaro Martinez.
Sharjet fluturuan krejt pa etikë mes teknikut napolitan dhe kapitenit zikaltër.
Gjithsesi, në fushë u luajt një ndeshje dhe madje mjaft e rëndësishme.
Napoli fitoi duelin direkt për titull në Serinë A ndaj Interit dhe ngjitet në krye të renditjes.
Skuadra kampione në fuqi e Italisë ishte gjatë gjithë kohës në avantazh përpara një publiku të zjarrtë në stadiumin “Maradona”.
Mesfushori belg, De Brujne, kaloi vendasit në epërsi me 11-metërsh dhe miqtë nuk mundën ta barazonin apo ta përmbysnin rezultatin.
Skot Mektominai shënoi shkëlqyeshëm të dytën, dhe nuk mjaftoi rikthimi interist me penalltinë e gjuajtur mirë nga Hakan Çalhanoglu.
Anguisa vulosi shifrat në 66’, pra shpejt, ndërsa më pas nuk pati më gola.
Polemikat vazhduan edhe më pas, pasi Konte u përplas me administratorin e deleguar mik, Marotën, që u ankua për arbitrin.
Interi bëri më shumë, gjuajti më shumë drejt portës dhe mbajti topin në pjesën më të madhe të kohës, por pa rezultat.
Në këtë mënyrë, Napoli la pas humbjen e rëndë të pësuar në Holandë në mesjavë për Ligën e Kampionëve, dhe kampionët arritën vendin e parë në Serinë A me 18 pikë pas 8 javësh kampionat.
Milani është I dyti me 17, ndërsa Interi mbeti në kuotën e 15 pikëve.