Ministri i Brendshëm Sandër Lleshaj, gjatë fjalës së tij në interpelancë për grabitjen e Rinasit më 9 prill tha se kontraktori i Rinasit ka refuzuar policinë e shtetit të mbikqyrë kamerat. Madje ai shkoi më tej në qëndrimin e tij se janë evidentuar 12 probleme të mëdha në aeroport, por asnjë nuk është marrë në konsideratë nga koncesionari.
“Vërejtjet kryesore të bëra nga Policia janë portat e papërshtatshme, rrethimi i jashtëm pa sensorë, kamerat jashtë funksionit, ndriçimi i pistës i pamjaftueshëm, zona e tranzitit po ashtu, shërbimet e sigurisë të pamjaftueshme e të paplota. Janë të paktën 12 probleme të mëdha që janë evidentuar në kohë nga autoritetet përkatëse”, tha Lleshaj.
Sipas tij grabitja është kryer nga profesionistë që u larguan nga një tunel, dhe i ikën vëmendjes së policisë. “Masat e marra, reagimi i shpejtë i policisë kanë siguruar prova që japin shpresë të madhe në sukses për hetimin dhe zbardhjen e ngjarjes. Ky ishte episod i një serie ngjarjesh me të njëjtët autorë, ngjarja do zbardhet përfundimisht. Nuk ka qenë një rast i thjeshtë, grabitje me autorë profesionistë që kanë shpërthyer edhe zona sigurie më të mëdha, kanë shpërthyer burg të një vendi në BE, kanë vrarë punonjës policie dhe nuk është arritur të kapen, këtu kemi një sukses fillestar”, tha më tej ministri, duke garantuar zbardhjen e plotë të ngjarjes.