Parlamenti britanik votoi ditën e djeshme, në favor të një plani që do të detyronte qeverinë të legalizojë martesat midis gjinisë së njëjtë në Irlandën e Veriut, nëse deri më 21 tetor, nuk arrihet të formohet qeveria e re në Belfast.
Irlanda e Veriut është e vetmja pjesë e Mbretërisë së Bashkuar ku nuk lejohet martesa ndërmjet çifteve të së njëjtës gjini shkruan REL. Më parë këtë vit, mijëra njerëz marshuan nëpër Belfast, për të kërkuar njohjen e martesës ndërmjet qifteve homoseksuale.
Përpjekjet e mëparshme për të nxjerrë ligje, për martesën mes gjinisë së njëjtë, janë bllokuar nga partia Unioniste Demokratike (DUP), një aleat i rëndësishëm i kryeministres britanike në largim, Theresa May, pavarësisht se anketimet e opinionit, në vitet e fundit, kanë treguar se pjesa më e madhe e rajonit e përkrahin një gjë të tillë.