Kritikave ndaj financimit me 4 milionë euro të koncertit të Kanye West i është bashkuar edhe ish-deputetja e Partisë Socialiste, Marjana Koçeku, e cila ka reaguar publikisht kundër përdorimit të këtyre fondeve.
Përmes një postimi në rrjetet sociale, Koçeku argumenton se kjo shumë duhej të ishte orientuar drejt përballimit të rrezikut të zjarreve, forcimit të strukturave të emergjencave dhe mbështetjes së komuniteteve të prekura, sidomos në një periudhë kur vendi përballet me temperatura të larta dhe rrezik të shtuar për vatra zjarri.
Ajo rikujton situatën e rëndë të vitit të kaluar, kur zjarret shkaktuan dëme të mëdha në sipërfaqe të gjera pyjore dhe mjedisore, duke theksuar se Shqipëria mund të përballet me një sezon edhe më të vështirë këtë verë.
“Vjet vendi ynë kaloi një katastrofë zjarresh. E kam pa nga afër dëmtimin e jashtëzakonshëm që iu ba natyrës. Këtë vit pritet që situata të jetë edhe ma alarmante për shkak të temperaturave të larta.
4 milionë eurot e nji stadiumi njipërdorimsh do të duhej të ishin investu në parandalimin e zjarreve, në mbështetjen e banorëve dhe në forcimin e kapaciteteve të emergjencave.
Shteti dhe llogaridhania nuk zëvendësohen me spektakël. Humbja e natyrës asht humbje e Shqipnisë”, shkruan Koçeku.