Partia Demokratike e njohur si zyrtare ka organizuar një tryezë dialogu “Harku Euro-Atlantik”. Në krah të Lulzim Bashës është edhe ish-presidenti Bamir Topi dhe avokati Spartak Ngjela. Në fjalën e tij, Topi kujtoi marrëveshjen e vitit 2008 e cila shkelmoi kushtetutën.
”Nuk mund të lë pa përmendur kontekstin historik atë që ndodhi në prillin e vitit 2008. Prilli i vitit 2008 erdhi shumë shpejt pas një ngjarjeje tragjike, e kam fjalën për shpërthimin e Gërdecit. E kujtoj fare mirë një kryeministër në hall, një mazhorancë në hall. Përgjegjësinë dhe uljen e kredibilitetit qoftë në opinionin publik dhe atë ndërkombëtar. Dhe papritur vijnë komunikime të nëndheshëm të një marrëveshjeje të errët okulte që paralajmëroi një shpërthim tjetër.
Paralajmërimin e parë e kam bërë në 15 prillin e vitit 2008 se çfarë do ndodhte. Shumë njerëz e kufizojnë tek roli i kryeministrit unë i ftoj të kthehen. Është marrëveshje shumë komplekse. Fillon me institucionin e zgjedhjeve, vijon me rolin e parlamentit, dëmtimin e fortë të balancave institucionale me dobësimin e rolit të presidentit.
Kemi parti politike, që nuk konsiderohen më parti politike, po kazerma politike. Listat vijnë me firma kryetari. Kemi një parlament që ka ulur ndjeshëm cilësinë e tij. kemi një parlament që ka rënë në thundrën e kryeministrit”,-tha Topi.