Autoritetet italiane kanë shkatërruar një bandë shqiptarësh që merreshin me grabitjet e banesave. Mësohet se shqiptarët kishin në shënjestër zonat e provincës toskane, në Firence, Siena dhe Arezzo. Së fundmi bënë një goditje në Londo, por kjo do të rezultonte fatale për arsye se ishin nën vëzhgim nga policia.
Të arrestuarit janë të moshave 46, 49 dhe 53 vjeç. Identitetet e tyre nuk janë bërë të ditura, por mësohet se banonin të gjithë në Firence. Shqiptarët u kishin krijuar probleme prej disa kohësh autoriteteve italiane.
Ata vidhnin banesa dhe hotele ku qëndronin turistë. Gjithçka nisi dimrin e shkuar, kur pati denoncime të shumta në Londa. Të njëjtat denoncime u ndoqën edhe më vonë në disa bashki të tjera. Kamerat e sigurisë shërbyen për të treguar se si operonin shqiptarët.
Gabimi që do të kapte shqiptarët do të ishte një makinë e vogël në emër të 53-vjeçarit shqiptar. Këtu nisi gjurmimi i grupit. Sipas hetimeve, banda lëvizte pasditeve vonë ose në darkë pranë shënjestrave.
Makinën e parkonin në një distancë të caktuar nga shtëpia që do të vidhnin. Pastaj në këmbë shkonin dhe qëndronin në zonat pyjore që rrethonin vilat. Shpesh, sipas mediave italiane, qëndronin edhe me orë të tëra dhe prisnin sa të binte nata në mënyrë që të kryenin grabitjet.
Ata merrnin para dhe sende me vlerë. Kështu që një natë, shqiptarët u ndoqën nga policia, derisa u kthyen në Firence herët në mëngjes. Pas kësaj, u vunë menjëherë në pranga. Megjithatë vijojnë hetimet për të zbuluar nëse pjesë e grupit kishte të tjerë persona.