Can Kariçi që u vra mbrëmjen e sotme në Kodër-Kamëz dyshohet se u ekzekutua me armë zjarri me silenciator për larje hesapesh mes dy grupeve kriminale.
I riu njihet si personazh i një grupi kriminal të rrezikshëm në zonën e Lezhës.
Teksa drejtonte mjetin e tij me targa gjermane, persona ende të paidentifikuar i kanë bërë pritë para makinës “Golf 4”, dhe e qëlluan me armë. Të dyja anët e rrugës, që lidh Bathoren me Institutin kanë kamera, që do të këqyren nga policia në përpjekje për të identifikuar autorët.
Dyshohet se kanë qenë dy persona pjesëmarrës në këtë krim, një drejtonte mjetin dhe tjetri që ka hapur zjarr ndaj të riut, duke i shkaktuar atij vdekjen në vend.
Po ashtu, policia po heton rreth faktit se ngjarja e sotme ka lidhje me vrasjen e dyfishtë të ndodhur në Astir, ku u vranë Erigers Mihasi dhe Armand Dumani.
Ndër të tjera, dyshohet se mes autorëve dhe viktimës mund të kishte njohje, pasi nga dëshmitarët e ngjarjes, thuhet se ka pasur një komunikim të vogël verbal mes viktimës dhe autorëve.