Motra e Aleksandër Sadikajt, 27-vjeçarit që u vra të shtunën në Tiranë, ka treguar për jetën e të vëllait, duke e përshkruar si një person që nuk kishte konflikte me njeri.
Në një intervistë të dhënë për “Fax News”, ajo u pyet për jelekun antiplumb që u gjend në banesën e të ndjerit. Sipas sa, jelekun ia kishte bërë dhuratë një shoku i tij në Greqi, dhe se nuk është përdorur asnjëherë.
“Vëllai im nuk kishte konflikte me asnjë njeri, ishte i lirë, bënte jetë familjare me ne. Lëvizte në këmbë, i pëlqente të bënte xhiro me biçikletë. Rrinte gjithë ditën në lokalin familjar që kemi në Tiranë. Ne kemi bërë një jetë të qetë, mediat po shkruajnë shumë gjëra të pavërteta. Ai jetonte në një shtëpi me qera prej 4 vitesh, nuk e kishte ndërruar kurrë, bashkëjetonte me një vajzë. Unë shkoja pothuajse çdo natë atje, më merrte e makinën e tij bashkë me vajzën time të vogël. Me atë makinë që ndodhi ngjarja, shkonim në shtëpinë e tij.”
Pyetje: Një tjetër dyshim është se vëllai juaj ishte i përfshirë në një grup kriminal në Holandë…
Vanesa Sadikaj: Nuk ka lidhje fare, vëllai im nuk njeh njeri atje, nuk ka shkuar kurrë në Holandë.