Të tjera detaje dalin në dritë në lidhje me arrestimin e 30-vjeçares Veriana Gega, e cila u arrestua sot nga policia e Tiranës për mashtrim. Ndaj të resë ishin depozituar 40 kallëzime nga persona të ndryshëm, mes të cilëve edhe familjarë të vajzës.
Duke iu referuar hetimeve, Çelmeta raporton se 30-vjeçarja iu ka marrë qytetarëve shuma të mëdha parash duke i mashtruar me viza dhe punësime jashtë territorit shqiptar. Shumica e qytetarëve të mashtruar janë nga qyteti i Tiranës dhe i Elbasanit.
Denoncimi i fundit ndaj 30-vjeçares për mashtrim është bërë nga një shtetas kosovar, i cili i kishte dhënë asaj shumën prej 16 mijë eurosh për ta pajisur me pasaportë shqiptare. Pas denoncimit 30-vjeçarja u arrestua nga policia në kuadër të operacionit ‘Promise’. Aktualisht policia vijon hetimet për dokumentimin e plotë të ngjarjes.