Gjatë ditës së djeshme në 12 shtator, një sasi e vogël tritoli është vendosur në derën e shtëpisë së 36-vjeçarit M.L në Kamëz.
Ngjarja ndodhi në orët e para të mëngjesit në lagjen “Rozafa” në Bathore. Fatmirësisht, nga shpërthimi ka pasur vetëm dëme materiale.
Edhe policia njoftoi për shpërthimin në derën e banesës.
“Më datë 12.09.2026, rreth orës 03:35, në rrugën “Rozafa”, në Bathore, ka shpërthyer një sasi e vogël lënde e dyshuar plasëse, e vendosur në portën e banesës së shtetasit M. L., rreth 36 vjeç.
Si pasojë, janë shkaktuar vetëm dëme materiale. Grupi hetimor vijon punën për zbardhjen e rrethanave të rastit, identifikimin dhe kapjen e autorit/autorëve”, njoftonin uniformat blu.
Kush është ‘shënjestra’, i dyshuar si porositës i disa vrasjeve
Personi, që iu vendos tritol në derën e banesës në Bathore është shtetasi M.L. Ky person njihet ndryshe edhe me emrin G.L, si dhe me pseudonimin “Maloku”.
Ai është dënuar nga SPAK për plagosje, trafik droge, dhe gjobëvënie në kuadër të grupit të strukturuar kriminal. Dyshohet se ka lidhje me njerëz tepër të rrezikshëm të botës së krimit. Po ashtu, dyshohet si porositës i disa vrasjeve.