Vajza e presidentit amerikan Donald Trump, njëkohësisht edhe këshilltarja e tij Ivanka, është një nga kandidatet kryesore për të zëvendësuar presidentin e Bankës Botërore në largim koreanojugorin Jim Yong Kim.
Kështu raporton e përditshmja Financial Times, sipas së cilës administrata Trump tashmë ka si detyrë të bëjë rekomandimin e saj për kreun e ri të institucionit madhor dhe përveç bijës së presidentit mendohet se mund të përfshihen zv. sekretari i marrëdhënieve me jashtë David Malpass, drejtori i USAID Mark Green, apo dhe ish-ambasadorja amerikane në OKB, Nikki Haley.
Banka Botërore me bazë në Uashington, u themelua pas Luftës II Botërore për financimin e projekteve të zhvillimit në vendet e varfra dhe tradicionalisht është drejtuar nga një amerikan.
Ndryshe nga kandidatët e tjerë, Ivanka nuk ka eksperiencën e nevojshme në tregti ndërkombëtare, por ka qenë në sferën e biznesit. Para se të vinte në Shtëpinë e Bardhë ajo drejtonte sektorine blerjeve në organizatën e biznesit Trump, dhe drejtonte linjën e saj të modës Ivanka Trump e cila u mbyll verën e kaluar.
Presidenti Trump kishte përmendur Ivankën dhe si zëvendësuese të ambasadores në largim Nikki Haley, por përfundimisht emëroi zyrtaren e Departamentit të Shtetit, Heather Nauert pas ngritjes së shqetësimeve për nepotizëm.